Buz baxışlar, buz qəlblər,
Şaxtadan donmuş üzlər...
Belə vaxtlar səninçün,
İsti nəfəsin üçün,
Sözün-söhbətin üçün,
Çox darıxıram, ana...
Qayıt, məni soyuqdan,
Şaxtadan, buzdan qurtar,
Əlimdən tut keçmişə,
Uşaqlığıma apar,
Bir anlığa da olsa,
O qayğısız günləri,
Mənim özümə qaytar...
Bir nağıl danış, sonra,
Nağıl çatmasın sona.
Nağıllar qurtaranda
Göydən düşməsin alma
Mənə çatmasın alma
Mən qayıdım keçmişə,
Uşaq qalım həmişə...
Müəllif: Gülzar İbrahimova